Ұйымдастырылған оқу қызметі: «Өзін-өзі тану»
Тақырыбы: «Өзін-өзі тану әлемі бізді қонаққа шақырады»
Мақсаты: «Өзін-өзі тану» әлемі туралы түсініктерін кеңейту. Жақсы және жаман қасиеттерді айыра білуге үйрету. Өзін және өзгелерді тануға тәрбиелеу.
Шаттық шеңбері:
Педагог балаларды шеңберге жинап, шаттық шеңбері туралы әңгімелеседі.
-Балалар, бүгін мен сендермен осындай әсем, жарық, кең бөлмеде кездескеніме өте қуаныштымын!
-Қане балалар, бәріміз бір-біріміздің қолымыздан ұстап, шеңбер құрып тұра қалайық!
-Армысың шапағатты күніміз!
-Армысың мейірімді жеріміз!
-Армысың Табиғат-Анамыз!
-Әдеппен бас иер баламыз!
-Қайырлы таң, қайырлы күн баршаға,
-Қош келдіңіз, біздің балабақшаға!
Педагог:
-Жарайды, балалар орнымызға жайғаса қояйық.
Әңгімелеу:
-Балалар, Өзін-өзі тану әлемі бізге не туралы үйретеді?
Балалар:
-Мейірімділікті, ізгілікті, жақсылықты үйретеді.
Педагог:
-Дұрыс айтасыңдар балалар, ал біз жақсылық туралы, әдептілік туралы тақпақтар білеміз бе?
Қане, кім айтады?
1-бала:
Жақсы болу өзіңнен,
Жаман болу өзіңнен.
Өзіңді-өзің ая да,
Өзіңнен үйрен, өзіңнен.
2-бала:
Өзін-өзі танудан,
Жақсылықты үйрендік.
Жамандықтан жирендік,
Ерекше бір күйге ендік.
3-бала:
Үлкенді кім сыйласа,
Кім үлкенді тыңдаса.
Үлкен болған кезінде,
Сыйлы болмақ өзі де!
Педагог:
-Жарайсыңдар, балалар! Өте жақсы, ал енді біз назарымызды экранға аударып, мұқият қарайық.
/Экраннан «Біздің отбасы» тақырыбында бейнебаян көрсетіледі/
Әңгімелесу:
-Балалар, бейнебаянда кім туралы көрсетілген?
-Баланың қылығы дұрыс па? Сіздер оның орнында болсаңыз, не істер едіңіз?
/Балалар жауабы тыңдалады/
-Балалар, ал енді ойын ойнағыларыңыз келе ме?
Ойын: «Жақсы мен жаман»
Шарты: Берілген суреттердің ішінен жақсы әрекеттерді бір бағанға, жаман әдеттерді екінші бағанға жинау.
Педагог:
Жақсы, сендер енді жақсы, жаман әдеттерді айыра алатын боласыздар. Енді орнымыздан тұрып, сергіту жаттығуын жасайық.
Сергіту сәті:
Мынау – менің жүрегім,
Бәрі осыдан басталған.
Мынау – басым ақылды,
Бәрін осы басқарған.
Мынау – менің оң қолым,
Мынау – менің сол қолым,
Барлық істі атқарған!
Педагог:
-Енді орнымызға отырып, алдымызға берілген нәрселермен жұмыстанамыз.
Шығармашылық жұмыс:
-Балалар, мынау ненің суреті?
Балалар:
-Жүрек
Педагог:
Дұрыс айтасыңдар, жүрек. Ал жүрек біздің денеміздің қай жағында орналасқан?
Балалар:
-Сол жағында
Педагог:
-Иә, балалар жүрек біздің сол жақ көкірегіміздің төменгі жағында орналасқан. Біздің бүкіл денеміздің жұмыс жасап тұруы осы жүрегімізге байланысты. Жүрек қан айналым қызметін атқарады. Ол сағаттың тықылындай тырс-тырс етіп соғады. Егер біздің жүрек соғуымыз тоқтаса, біздің бүкіл денеміз жұмыс істеуін тоқтатады. Қазір біз алдымыздағы түрлі-түсті жұмсақ қағаздан жүрек қиямыз. Ол жүректерді біз тілек ағашына жапсырамыз. Тек жапсырып қана қоймай, достарымызға тілек айтамыз.
Балалар:
- Күніңіз сәтті өтсін!
-Мен сендерге жақсылық тілеймін!
-Мен сендерге бақыт тілеймін!
Педагог:
-Тілектеріңіз қабыл болсын, балалар. Енді саусақтарымыз шаршаған болар, кішкене жаттығу жасап жіберейік.
Саусақ жаттығуы: «Салат»
-Балалар, саусақтарымызға жаттығу жасайық. Алдымен сәбіздің сыртын тазалаймыз, оны үккіштен өткіземіз. Ал енді оның үстіне қант себеміз, «ах» біздің қарнымыз тойды.
Педагог:
-Жақсы бала қандай болу керек?
Балалар:
-Ол жақсылық жасай білетін, сүйіспеншілігі мол, айналасына қуаныш сыйлайтын бала.
Педагог:
-Өзін-өзі тану ұйымдастырылған оқу қызметінде біз қандай сөздермен таныстық?
Балалар:
-Жақсылық, сүйіспеншілік, қуаныш, мейірімділік сөздерімен таныстық.
Педагог:
-Жарайды, балалар енді шеңберге тұрып, жүректен шыққан жылы сөздерімізді бір-бірімізге жолдайық.
Жүректен-жүрекке:
Балалар шеңберге жиналады, жұмсақ ойыншық жүректі бір-біріне сыйлай отырып, жақсы тілектер білдіреді.
-Мен саған қуаныш тілеймін!
-Мен саған жақсылық тілеймін!
-Үлкен азамат бол, т.с.с…
Педагог:
-Керемет, біздің әрқайсымыздың жүрегіміз осы жұмсақ ойыншықтай күлімдеп, қуанышқа бөленді. Әрқашан осылай жылы сөздермен бір-бірімізді қуанта берейік! Бүгінгі ұйымдастырылған оқу қызметіне барлығыңыз жақсы қатынастыңыздар. Рахмет сендерге!
